Bilim-nurana geljege ak ýol
Berkarar döwletiň täze eýýamynyň Galkynyşy döwründe ýurduň ykdysadyýetiniň pudaklary we beýleki ulgamlary üçin bilim we amaly taýdan kämil, medeniýetli hünärmenleri taýýarlamaga, şahsyýetiň bilimini çuňlaşdyrmaga we giňeltmäge bolan isleglerini kanagatlandyrmaga, jemgyýetiň ruhy-ahlak, medeni we ylmy gymmatlyklaryny toplamaga, goramaga hem-de baýlaşdyrmaga ähli şertler döredilýär. Ýurdumyzda sanly bilim ulgamyny ösdürmek boýunça degişli işleriň alnyp barylmagy we bilim edaralarynyň maddy-enjamlaýyn binýadyny berkitmek işiniň yzygiderli dowam etdirilmegi berilýän bilimiň döwrebap bolmagyny üpjün edýär. Ýurdumyzda Garaşsyzlyk ýyllary içinde milli bilim ulgamy uly özgerişleri, ösüşleri başdan geçirýär. Bu ugurda Gahryman Arkadagymyz tarapyndan başy başlanan beýik işler Arkadagly Serdarymyz tarapyndan mynasyp dowam etdirilip, täze tapgyrlara çykarylýar. Häzirki zaman tehnologik enjamlary bilen enjamlaşdyrylan täze we durky täzelenen mekdepler şu günki gün bilim bermek işine sanly bilimiň ornaşdyrylmagy üçin ajaýyp maddy-tehniki binýat bolup hyzmat etdi. Şuňa laýyklykda, okuw meýilnamalaryna we maksatnamalaryna degişli üýtgetmeler girizilýär. Soňky birnäçe ýylyň dowamynda ýurdumyzda sanly bilim ulgamyny ornaşdyrmakda epesli işler edildi. Bilim bermek we bilim öwrenmek işinde sanly ulgamdan peýdalanmak bilim-terbiýeçilik işiniň has janly we häzirki zaman talaplaryna laýyk derejede guralmagyna mümkinçilik berýär. Bilim ulgamyny kämilleşdirmek we döwrebaplaşdyrmak üçin döwletimiz tarapyndan bimöçber serişdeler goýberilýär, bilimiň hilini halkara talaplara laýyk getirmek ugrunda ägirt uly işler durmuşa geçirilýär. Hormatly Prezidentimiziň milli bilim ulgamyny kämilleşdirmek bilen bagly kabul edýän resminamalary düýpli bilim özgertmelerini durmuşa geçirmäge, ýurdumyzy ykdysady, syýasy we medeni taýdan ösdürjek, giň gözýetimli, döwrümiziň ösen talaplaryna laýyk ökde hünärmenleri taýýarlamaga gönükdirilendir.
Allamyrat NURMÄMMEDOW
Türkmen döwlet binagärlik gurluşyk institutynyň mugallymy
