Ylym ösüşiň kuwwatly güýji

Ylym islendik döwürde we döwletde jemgyýetçilik ösüşiniň kuwwatly özgerdiji güýji hökmünde uly ähmiýete eýedir. Şeýlelikde, biziň ýurdumyzda hem ylym dünýäniň ösen döwletleriniň hataryna goşulyşmagynyň möhüm şerti bolup durýar. Şoňa laýyklykda, ýurdumyzda ylym ýokary depginler bilen ösdürilýär. Onuň gazananlary we dünýä ylmynyň netijeleri önümçilikde hem-de bilim ulgamynda işjeň peýdalanylýar. Ýurdumyzyň bilim syýasatynyň iň möhüm bölegi dünýäniň esasy ylym we bilim merkezleri bilen halkara hyzmatdaşlygyny ýola goýmakdan ybaratdyr. Şundan ugur alnyp, ýurdumyzyň ylym we bilim beriji edaralarynyň maddy-enjamlaýyn binýady berkidilýär hem-de yzygiderli döwrebaplaşdyrylýar. Alymlaryň abraýynyň ýokarlanmagy, ylmy döredijilik bilen işjeň meşgul bolmaga we ylma ukyply ýaş alymlary çekmäge mümkinçilikleriň giňelmegi, bu ulgamda halkara hyzmatdaşlygynyň ösmegi bilen, türkmen ylmy özüniň ösüşinde hil taýdan täze, has belent sepgitlere çykýar. Eziz Diýarymyzda halkyň aň-bilim mümkinçilikleriniň netijeli ugurlarynyň artdyrylmagy hem-de bu ugurda amal edilýän uly işler ähli üstünliklerimiziň özeni bolup durýar. Şeýle uly mümkinçiliklerden giňişleýin peýdalanýan ýaşlar ýurdumyzyň ykdysadyýetine, senagatyna degişli pudaklarynda, ylym, bilim, saglygy goraýyş ulgamlarynda durnukly ösüşiň maksatlaryna ýetmek ugrunda gazanylýan ösüşlere uly goşant goşýarlar. Eziz Diýarymyzda durmuş-ykdysady we medeni ösüşi kesgitleýän esasy şertleriň biri bolan bilim ulgamynda ýetilen sepgitler, ajaýyp üstünlikler Arkadagly Serdarymyzyň pähim-paýhasy we parasatly başlangyçlary netijesinde gazanylýar. Ylym-bilimi ösdürmekde beýik işleri durmuşa ornaşdyrýan hormatly Prezidentimiziň jany sag, ömri uzak bolsun!