Asylly ýörelgeleriň beýany

Gahryman Arkadagymyzyň «Ömrümiň manysy» atly ajaýyp eserinde nesilleriň ylymly, sowatly, medeniýetli bolup ýetişmegine aýratyn üns berilýär. Milli däp-dessurlar, köp çagalylyk, watançylyk, harby gahrymançylyk baradaky gürrüňler eseriň içinden eriş-argaç bolup geçýär. «Köp çagaly maşgalada agalarynyň eşiklerini inilerine, gyz doganlarynyň lybaslaryny kiçi uýalaryna geýdirmek hem ýörgünli. Şeýtmek bilen, parasatly türkmen halky perzentlerinde pespälligi, kicigöwünliligi, özara sylag-hormaty terbiýeläpdir. Kiçiler uly doganlarynyň eşiklerini geýip, olara meňzemäge, batyr, zähmetsöýer, erjel bolmaga çalşypdyrlar» diýip, Gahryman Arkadagymyz kitabynda halkymyzyň sadalyga, pespällige ýugrulan milli dessurlaryny ýürege ýakyn pursatlar, jaýdar jümleler bilen beýan edýär. Şeýle ýörelgeler, dogrudanam, maşgalada çagalaryň özara agzybirligini pugtalandyrýar. Doganlaryň ýüreginde biri-birine bolan söýgi, hormat döredýär. Gahryman Arkadagymyzyň bütin ömrüniň dowamynda ýolbaşçy düzümlerde işläp, halkymyzyň bagtyýarlygy ugrunda aladalar etmegi, uly işleri amala aşyrmagy ildeşlerimiziň kalbynda egsilmejek ynam döretdi. Ýurdumyzyň Baştutany bolup işlän 15 ýylynyň dowamynda Gahryman Arkadagymyz halkyň asuda, bagtyýar, rahat ýaşamagy üçin ençeme maksatnamalary amala aşyrdy. Gahryman Arkadagymyzyň başlangyçlary ýaşlaryň durmuşynda hem düýpli oňyn özgerişleri emele getirdi. Biziň her birimiz Aşgabada gezelenje çykýarys. Şaýollardaky bökdençsiz gatnap duran awtobuslar, gadymy ak öýlerimize çalymdaş duralgalar eşretden nyşan. Arassa seýilgähler, sport we dynç alyş merkezleri raýatlaryň hyzmatynda. Şaýollaryň çatrygyndaky heýkeller paýtagtymyza görk berýär. Olaryň arasynda türkmen alabaýynyň heýkelini aýratyn belläsim gelýär. Alabaý itlerimiz halkymyzyň wepaly ýoldaşy, daşynyň goragy hasaplanýar. Ol biziň milli gymmatlyklarymyzyň biri. Gahryman Arkadagymyzyň kitabynda belleýşi ýaly, halkymyzyň däp-dessurlary, ýörelgesi — halkymyzyň bahasyz milli gymmatlygy. Milli gymmatlyk bolsa, goralmaga, öwrenilmäge, dowam etdirilmäge, ösdürilmäge degişlidir.

Gaýypnazar BALLYÝEW
Türkmen döwlet binagärlik gurluşyk institutynyň mugallymy