Sanly ulgam — döwrebap ösüş
Häzirki wagtda döwlet Baştutanymyzyň parasatly ýolbaşçylygynda ýurdumyzyň ykdysadyýetiniň ähli pudaklarynda ylmyň we tehnikanyň soňky gazananlary, öňdebaryjy halkara tejribeleri hem-de döwrebap tehnologiýalar giňden ornaşdyrylyp, ýokary ykdysady netijeler gazanylýar. Ykdysady we durmuş gatnaşyklarynyň täze ulgamy depginli ösdürilýär. Şeýle ösüşler bolsa, dünýä senagat önümçiliginde bolup geçen özgerişliklerden oňyn netije çykarmaga mümkinçilik berýär. Türkmenistanda sanly ykdysadyýeti ösdürmek boýunça «Türkmenaragatnaşyk» agentliginiň utgaşdyrmagynda edaralaryň, kärhanalaryň we guramalaryň her birinde maglumatlary saklaýan, gaýtadan işleýän serwer we ulgam enjamlarynyň bir bitewi ulgama birleşdirilmegini üpjün edýän täze innowasion tehnologiýalar ornaşdyrylýar. Önümçilik pudaklaryny awtomatlaşdyrmak, hasaba alyş we buhgalter hasabatyny ýönekeýleşdirmek, elektron hyzmatlar ulgamyny ösdürmek maksady bilen, Türkmenistanyň bir bitewi Döwlet hyzmatlary hem-de işler portaly e.gov.tm döredildi. Bu portal raýatlar hem-de işewürlik üçin elektron görnüşinde döwlet hyzmatlaryny ýerine ýetirmäge «Bir penjire» diýen awtomatlaşdyrylan maglumat ulgamy hökmündedir. «Bir penjire» ýörelgesi hyzmatlardan peýdalanmak üçin ýüz tutýandan resminamalaryň merkezleşdirilen görnüşde kabul edilmegini, şeýle hem resminamalary taýýarlamagyň möhletiniň berjaý edilişine hem-de olaryň berilmegine gözegçiligi üpjün etmegi amala aşyrmaga mümkinçilik berýär. Ähli ylym-bilim edaralaryny, iş ýerlerini dünýäniň ösen tehnologiýalary bilen üpjün etmäge, halkara hyzmatdaşlygyny ýola goýmaga, şonuň bilen baglylykda milli ykdysadyýetimizi barha kuwwatlandyrmaga giň mümkinçilikleri döredip berýän Arkadagly Serdarymyzyň jany sag, ömri uzak bolsun!
Wepa SÄHEDOW
Türkmen döwlet binagärlik gurluşyk institutynyň talyby
