Ylmyň we tehnologiýanyň zamanasy

Mälim bolşy ýaly, häzirki döwürde ýurdumyzyň ähli pudaklarynda işler dünýäniň ösen döwletlerinde öndürilýän ýokary tehnologiýalar arkaly ýerine ýetirýärler. Şoňa baglylykda, ýurdumyzda maglumat-tehnologiýa ulgamy boýunça işgärleriň sowatlylygyny ýokarlandyrmak üçin  dürli işler alnyp barylýar.
Häzirki wagtda sanly ulgamyň giňişleýin ulanylýan zamanasynda ähli pudaklarda ýerine ýetirilýän işler, hyzmatlar, aragatnaşyk we maglumatlar  ulgamy kompýuter tehnologiýasynyň üsti bilen amala aşyrylýar. Sanly ulgamyň kemala getirilmegi, ilki bilen, ylmy-tehniki ösüşiň başlangyjy bolup durýar. Şunda ýaşlaryň ukyp-başarnyklaryny ýüze çykarmak, ylmyň we tehnologiýanyň gazananlaryny önümçilige ornaşdyrmak dürli ugurlarda döwrebap tejribäni peýdalanmak bilen aýrylmaz baglanyşykda bolmak arkaly ykdysadyýetdäki sanly özgertmeler esasynda jemgyýetiň ýaşaýyş durmuşyny ýeňilleşdirýär.
Biz ýaşlaryň döwrebap bilim alyp dürli pudaklarda  zähmetsöýer hünärmenler bolup ýetişmegimiz üçin bilim almak mümkinçilikleri yzygiderli giňeldilýär. Sanly  ulgamy kämilleşdirmäge gönükdirilen ähli işler eziz Watanymyzyň ählitaraplaýyn ösüşiniň hil taýdan täze derejä çykmagynda möhüm ugur bolup durýar.

Meýlis SÄHEDOW
Türkmen döwlet binagärlik gurluşyk institutynyň talyby