Şöhraty öçmejek Beýik Ýeňiş

Berkarar döwletiň täze eýýamynyň Galkynyşy döwründe Hormatly Prezidentimiz 1941—1945-nji ýyllaryň Beýik Watançylyk urşunyň weteranlarynyň, urşa gatnaşyjylaryň ýan-ýoldaşlarynyň hemde uruş ýyllarynda tylda zähmet çeken weteranlaryň görkezen deňsiz taýsyz edermenligini hormatlap, olaryň ýaş nesillerimizi watançylyk, gahrymançylyk, mertlik ruhunda terbiýelemekde, halkymyzyň agzybirligini, jebisligini berkitmekde alyp barýan asylly işlerine, ýurdumyzda amala aşyrylýan özgertmeleri üstünlikli durmuşa geçirmäge goşýan goşantlaryna ýokary baha berýär. 1941 —1945-nji ýyllarda doganlyk halklar bilen birlikde urşuň agyr synaglaryny başdan geçiren watandaşlarymyzyň müňlerçesi dünýäde parahatçylygyň we azatlygyň hatyrasyna söweş meýdanlarynda edermenligiň, gaýduwsyzlygyň, hakyky watançylygyň hem-de belent adamkärçiligiň deňsiz-taýsyz nusgasyny görkezdiler. Olaryň yzynda galanlar tylda gije-gündiz gaýratly zähmet çekip, bol hasyl öndürdiler, fronta zerur bolan önümleri, egin-eşik, azyk iberdiler, goranmak gaznasyna altyn-kümüş şaýsepleri tabşyrdylar. Türkmenistanly esgerleriň köpüsi urşuň gazaply, synagly ýollaryny geçip, görkezen edermenlikleri üçin söweşjeň ordenler we medallar bilen sylaglanyp, olaryň ýüzden gowragy bolsa Gahryman diýen belent ada eýe boldular. Milli gahrymanlaryň atlary «Hatyra» we «Şöhrat» ýadygärlik kitaplarynda ebedileşdirildi. Ondan bäri aýlar aýlanyp, 78 ýyl geçdi. Ýöne türkmen ýigitleriniň söweş meýdanynda görkezen edermenlikleri unudylanok. Çünki Beýik Watançylyk urşunda  nesilleriň bagtyýar durmuşy üçin şirin janlaryny gurban eden gerçeklerimiz, sag-aman ata Watanymyza dolanyp gelen we häzir hem aramyzda ýaşap ýören merdana uruş weteranlarymyz, urşa gidenleriň yzynda galyp, ojaklaryny gözleriniň göreji deýin saklan ak saçly enelerimiz ajaýyp döwrümiziň nesilleri üçin gahrymançylygyň, mertligiň,  wepadarlygyň beýik mekdebidir. Hut şonuň üçin-de, şöhraty öçmejek Beýik Ýeňiş, ony getiren merdana ogullar hemişe ýagşylykda ýatlanylýar, geljekde hem ýatlanylar.