Watanymyzyň ösüşli menzillerine bolan buýsanç
Ýaşlar her bir döwletiň altyn gaznasy hasaplanýar. Ýurduň halk hojalygynyň ähli pudaklarynyň sazlaşykly ösüş depgini, halkyň nurana geljegi köp babatda ylym-bilimli, giň dünýägaraýyşly, ahlakly we ýokary medeniýetli ýaş nesillere baglydyr. Şonuň üçin hem ýaşlaryň kämil şahsyýetler bolup ýetişmegi ugrunda ýurdumyzda döwlet derejesinde uly aladalar edilýär. Ýaşlary milli ýörelgeler esasynda terbiýelemek döwrüň möhüm talabydyr. Şu nukdaýnazardan, Arkadagly Serdarymyzyň tagallasy bilen Berkarar döwletiň täze eýýamynyň Galkynyşy döwründe ýaşlar syýasatyny işjeň durmuşa geçirmek babatda ägirt uly işler amala aşyrylýar. Gahryman Arkadagymyz sanly ulgam arkaly GDA gatnaşyjy döwletleriň ýaşlar parlamentara forumynda ýaşlaryň halkara ynsanperwer gatnaşyklary pugtalandyrmakdaky orny hakyndaky çuň mazmunly eden çykyşy ähli watandaşlarymyzyň ýadyndadyr. Bu waka hormatly Arkadagymyzyň ajaýyp sözlerini, parasatly sargytlaryny ýüreklerine keşde eden döwrebap bilimli, ylymly, giň dünýägaraýyşly, öňdebaryjy we innowasion tehnologiýalardan baş çykarýan türkmen ýaşlarynyň ýelden ýyndam döwrümize, ata Watanymyzyň ösüşli menzillerine bolan buýsanç duýgularyny hasda artdyrdy. Ýaş nesilleri ata Watana wepaly, halka gerekli, arassa ahlakly, berk bedenli, zähmetsöyer, sowatly, däp-dessurlara, milli gymmatlyklara hormat goýýan, giň dünyägaraýyşly adamlar edip ýetişdirmek şu günüň wajyp meselelerinin biridir. Biz ýaşlaryň bagtyýar geljegi üçin giň mümkinçilikleri döredip berýän hormatly Prezidentimiziň jany sag, ömri uzak bolsun! Il- ýurt bähbitli, döwlet ähmiýetli işleri hemişe rowaç alsyn!
Ahmet SAHATOW
Ýagşygeldi Kakaýew adyndaky Halkara nebit we gaz uniwersitetiniň talyby
