Ýaşlar bilen diňe öňe
«Arkadag Serdarly bagtyýar ýaşlar» ýylynda ýaşlaryň döwrebap bilim almaklary, ukyp-başarnyklary esasynda öz maksatlaryny durmuşa geçirmekleri, ýurdumyzyň okgunly ösüşlerine öz goşantlaryny goşmaklary üçin ähli şertler döredilýär. Milli bilim ulgamyny kämilleşdirmek, ýokary ylmy mümkinçiligi bolan giň gözýetimli, maksadaokgunly, innowasion tehnologiýalary dolandyrmaga ukyply, ýokary hünärli, taýýarlykly ýaşlary terbiýeläp ýetişdirmek boýunça ähli tagallalaryň ediljekdigini hormatly Prezidentimiz Serdar Berdimuhamedow döwlet Baştutany wezipesine girişen pursatynda hem belläp geçipdi. Ýaşlarymyz munuň iş ýüzünde durmuşa geçirilýändigini ösüşlere beslenýän ajaýyp döwrümiziň bagtyýar günleriniň her bir pursatynda janly şaýatlary bolýar. Ýurdumyzyň dürli künjeklerinde döwrebap çagalar baglary, umumybilim berýän mekdepler, ýokary okuw mekdepleri yzygiderli gurlup ulanylmaga berilýär. Bar bolan bilim merkezleri döwrüň iň kämil enjamlary, kompýuter tehnologiýalary bilen üpjün edilip, olarda bilim berşiň iň döwrebap usullary yzygiderli ornaşdyrylýar. «Halkyň Arkadagly zamanasy» ýylynda ak şäherimiz Aşgabadyň Görogly köçesiniň ugrunda Türkmenistanyň Senagatçylar we telekeçiler birleşmesiniň ýokary okuw mekdebiniň gurluşygyna badalga berilmegi Arkadagly Serdarymyzyň parasatly baştutanlygynda ýaşlaryň döwrebap bilim alyp kämilleşmekleri ugrunda alnyp barylýan döwlet syýasatynyň üstünlikli ösdürilýändiginiň ýene bir aýdyň mysaly boldy. Goý, ýaşlar barada uly aladalar edýän hormatly Prezidentimiziň jany sag, belent başy aman bolsun!
Dünýägözel ÇARYÝEWA
Ýagşygeldi Kakaýew adyndaky Halkara nebit we gaz uniwersitetiniň mugallymy
