Maglumat-aragatnaşyk tehnologiýalaryna daýanyp

Hormatly Prezidentimiz Serdar Berdimuhamedowyň baştutanlygynda sanly tehnologiýalaryň ykdysadyýete we durmuşymyzyň ähli ugurlaryna ornaşdyrylmagy ileri tutulýan wezipeleriň hatarynda durýar. Bu ugurda döredilen kanunçylyk-hukuk we maddy-tehniki binýat ýokary netijeleri gazanmaga mümkinçilik berýär. Ýurdumyzda sanly ykdysadyýete tapgyrlaýyn geçilmegi «Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasyna» laýyklykda amala aşyrylýar. Onda milli ykdysadyýetimiziň ösüşini dünýäniň durnukly ösýän ýurtlarynyň derejesine ýetirmek esasy ýörelge bolup durýar. Ykdysady işjeňligiň, söwda amallarynyň we hünär gatnaşyklarynyň bitewi ulgamy bolan sanly ykdysadyýete, maglumat-aragatnaşyk tehnologiýalaryna daýanyp, önümçiligiň, zähmetiň, hyzmatlaryň täze usullaryny emele getirýär. Şonuň netijesinde, sanly ykdysadyýet ýurdumyzyň halk hojalygynyň ösüşiniň we önümçiligiň depgininiň artdyrylmagynyň, dolandyryş düzüminiň kämilleşdirilmeginiň esasyny düzýär. Täze sanly tehnologiýalaryň ykdysadyýetiň we durmuş ulgamynyň dürli ugurlaryna giňden ornaşdyrylmagy milli ykdysadyýetiň bäsdeşlige ukyplylygynyň artmagyna, ilatyň ýaşaýyş-durmuş derejesiniň ýokarlanmagyna ýardam berýär.

Sabina GEDAÝEWA
Türkmen döwlet binagärlik gurluşyk institutynyň talyby