Arkadag şäherinde akylly ulgam
Arkadag şäherinde akylly ulga
Akylly tehnologiýalar durmuşymyza barha giňden ornaşýar. Ahal welaýatynyň Arkadag şäherinde akylly ulgamyň giňden ornaşdyryljakdygy ýurdumyzyň dünýä ösüşi bilen aýakdaş gopýandygynyň guwandyryjy görkezijisidir. Biz hem akylly ulgamlar barada gysgaça gürrüň etmegi makul bildik
Akylly duralga. Akylly duralga ulaglaryň geljek wagtyny habar berýär. Şeýle-de ýolagça ulag serişdeleriniň gatnaw tertibi, ýöreýän ugry we petekleriň bahasy barada maglumatlary berýär. Bu duralgalarda mugt Wi-Fi-dan peýdalanyp bolýar.
«Akylly ýolyşyk» ulgamy. «Akylly ýolyşyk» ulgamynyň işi çatryklarygeçirijilik mümkinçiliklerini ýokarlandyrmaga gönükdirilendir. Bu işler ýolyşyklaryň umumylaşdyrylan dolandyryş düzümi arkaly amala aşyrylýar. Bu ulgam gözegçilerden, kameralardan we çatryklarda ulaglaryň toplanyş derejesine baha berip, bu baradaky maglumatlary merkezi dolandyryş serwerine habar berýän datçiklerden durýar.
ABŞ-nyň Karnegi-Mellona uniwersitetiniň alymlarynyň hasaplamalaryna görä, «Akylly swetofor» ulgamynyň ornaşdyrylmagy sürüjileriň ýolda geçirýän wagtyny 25 göterim tygşytlamaga, atmosfera zyýanly maddalaryň zyňylmagyny 21 göterim azaltmaga mümkinçilik berýär.
«Akylly kitaphana» ulgamy haýsy kitabyň köp ýa-da az okalýandygy, haýsy bölümlerde iş ýüküniň köpdügi-azdygy baradaky maglumatlary-da jemläp, bu netijäniň hasabyny ýöredip durýar. Akylly kitaphanalar aýratynlykda däl-de, tutuş bir ulgam görnüşinde göz öňünde tutulýar. Munda, esasan, kitaphanalaryň sazlaşykly hyzmatlary zerur. Ýagny üpjünçilikde, energiýa serişdelerini, işgärleriň we okyjylaryň işini, wagtyny tygşytlamakda akylly ulgamyň mümkinçilikleri uludyr. Binanyň awtomatlaşdyrylan inženerçilik ulgamy maglumatlary geçirmegiň we hasaba almagyň umumy toruna birikdirilýär. Ulanylmaýan otaglary ýylatmak ýa-da sowatmak, şeýle-de ýagtylyk üçin artykmaç energiýa sarp edilmeýär. «Akylly ulgam», hatda binada bejergi we abatlaýyş işleriniň zerurlygyny-da anyklap, bu barada habar berýär.
Rahymgeldi RAHMANGELDİÝEW
Türkmen döwlet binagärlik gurluşyk institutynyň mugallymy
