Kanunlarymyz döwrebaplaşdyrylýar

Arkadagly Serdarymyzyň milli kanunçylygymyzy kämilleşdirmek we ony halkara hukugyň umumy ykrar edilen kadalaryna laýyk gaetirmek boýunça berýän tabşyryklaryndan ugur alyp, hereket edýän kanunlarymyz döwrebaplaşdyrylýar. Türkmenistanyň Milli Geňeşiniň Mejlisi tarapyndan kabul edilen, Milli Geňeşiň Halk Maslahaty tarapyndan makullanylan «Elektron hökümet hakynda» Türkmenistanyň Kanuny ka­bul­ edil­di.­ Elektron hökümet hakynda Türkmenistanyň kanunçylygy Türkmenistanyň Konstitusiýasyna esaslanýar we şu Kanundan, «Elektron resminama, elektron resminama dolanyşygy we sanly hyzmatlar hakynda», «Maglumat we ony goramak hakynda», «Aragatnaşyk hakynda», «Innowasiýa işi hakynda», «Türkmenistanda Internet torunyň ösüşini we Internet hyzmatlaryny etmegi hukuk taýdan düzgünleşdirmek hakynda», «Kiberhowpsuzlyk hakynda» Türkmenistanyň Kanunlaryndan hem-de beýleki kadalaşdyryjy hukuk namalaryndan ybaratdyr. Kanunyň birinji babynyň umumy düzgünlerinde ulanylýan esasy, ýagny elektron döwlet hyzmaty, elektron döwlet hyzmatynyň dessury, elektron görnüşde pudagara özara hyzmatdaşlyk ulgamy, elektron hökümet, elektron hökümetiň ýeketäk barabarlandyryjysy, interaktiw döwlet hyzmaty, sargyt ediji, sargytnama düşünjeleri berlen. «Elektron hökümet hakynda» Türkmenistanyň Kanunynyň esasy wezipeleri döwlet edaralarynyň işiniň netijeliligini, dessinligini we aýdyňlygyny üpjün etmekden, olaryň jogapkärçiligini we ýerine ýetirijilik düzgün-nyzamlylygyny güýçlendirmekden ybaratdyr. Halkymyzyň asuda, sapaly, bolelin durmuşda ýaşamagy, ýurdumyzda demokratiýanyň, adam hukuklarynyň dabaralanmagy üçin beýik işleri durmuşa geçirýän, milli kanunçylygymyzyň yzygiderli döwrebaplaşdyrylmagy üçin hemmetaraplaýyn şertleri döredýän hormatly Prezidentimiziň jany sag, ömri uzak bolsun, il-ýurt bähbitli, umumadamzat ähmiýetli beýik işleri hemişe rowaçlyklara beslensin!