Ýol-ulag düzümi barha kämilleşýär
Hormatly Prezidentimiz Serdar Berdimuhamedowyň parasatly baştutanlygynda, ýurdumyzyň ulag-üstaşyr düzümi barha kämilleşýär we giňeýär. Muňa ýurdumyzyň üstaşyry we ýurduň içinde peýdalanmak maksady bilen gurulýan awtomobil we demir ýollary, howa we deňiz-derýa gatnawlary aýdyň şaýatlyk edýär. Ýurdumyzyň geografiki taýdan amatly zolakda ýerleşmegi dünýä döwletleriniň we abraýly iri kompaniýalarynyň Türkmenistan döwletimize barha artýan gyzyklanmalaryny şertlendirýär. Türkmen topragynyň üsti bilen Demirgazyk ― Günorta we Gündogar ― Günbatar ugurlar boýunça ýükleri we ýolagçy gatnawlaryny tiz, ýokary amatlykly geçirmäge örän oňaýly şertler bardyr. Bu tebigy mümkinçilikler Garaşsyzlyk ýyllarymyzda, hususan-da, mähriban Arkadagymyzyň döwletimize baştutanlyk eden ýyllarynda giňden peýdalanylmaga başlady. Gysga döwür içinde Demirgazyk ― Günorta ugry boýunça Gazagystan ― Türkmenistan ― Eýran halkara demir ýoly, Amyderýanyň üstünden geçýän häzirki zaman ýokary hilli awtomobil we demir ýol köprüleri, paýtagtymyzda we welaýat merkezlerinde Halkara howa menzilleri, Türkmenbaşynyň Halkara deňiz porty we beýleki iri düzümler gurlup ulanylmaga berildi. Häzirki wagtda ýurdumyzyň içerki çäklerini birikdirýän Gündogar ― Günbatar ugurly Aşgabat ― Türkmenabat we Aşgabat ― Türkmenbaşy ýokary tizlikli awtomobil ýollarynyň hem üstaşyr ulag geçelgeleriniň düzümini döwrebaplaşdyrmakda, ösdürmekde uly paýy bolar. «Halkyň Arkadagly zamanasy» ýylynda hormatly Prezidentimiz Serdar Berdimuhamedowyň başda durmagynda, bu iri düzümiň üsti Garabogaz aýlagynyň üstünden häzirki zaman talaplaryna laýyk gelýän ýokary hilli awtomobil köprüsiniň gurluşygyna badalga berdildi. Bu kölüsti köpriniň gurlup ulanylmaga berilmegi bilen, ýurdumyza goňşulykdaky Gazagystan Respublikasynyň üsti bilen gelýän halkara ýükleri we ýolagçylary göni ýol arkaly Türkmenbaşynyň Halkara deňiz portuna we goňşy Eýran döwletine tiz geçirmäge mümkinçilik dörär.
Agzalyp geçilen şular ýaly iri ýol-ulag düzümleriniň döredilmegi Türkmenistana daşary ýurtly hyzmatdaşlar bilen bilelikde utgaşykly sebit hem-de sebitara logistika ulgamyny döretmäge, Merkezi Aziýany we Ýewropany, Hazar, Gara deňiz hem-de Baltika sebitlerini, Orta we Ýakyn Gündogary, Günorta hem-de Günorta-Gündogar Aziýany birleşdirýän döwletara üstaşyr geçelgeleri kemala getirmäge mümkinçilik berer. Şeýle mümkinçikleriň döredilmegi bilen, ulag-üstaşyr amallaryň ýerine ýetirilmegine gatnaşýan, ýagny ýükleri we ýolagçylary iberýän, üstaşyr geçirýän we ahyrky kabul edýän ýurtlara ykdysady taýdan ýokary ösüş basgançaklaryna çykmaga giň şertler döreýär. Ilatyň iş orny bilen üpjünçilik meselelri hem oňyn çözülýär.
Biz ýurdumyzy ynamly ösüşler ýoly bilen öňe alyp barýan Arkadagly Serdarymyza jan saglyk, işlerinde üstünlik arzuw edýäris.
Aýlar JUMMİÝEWA
Ýagşygeldi Kakaýew adyndaky Halkara nebit we gaz uniwersitetiniň talyby
