Tebigy gazy suw ýollary arkaly daşamak

Häzirki zaman ýaşaýyş-durmuş, önümçilik we senagat maksatlary üçin tebigy gazy çykarmak bilen bir hatarda ony daşamak hem aýratyn ähmiýete eýedir. Şunda turbageçirijiler arkaly eltmek bilen bir hatarda ýörite gury ýer we suw ulaglaryny peýdalanmaga hem aýratyn üns berilýär. Adamzat taryhynda tebigy gazy suw ýollary arkaly daşamak üçin oýlanyp tapylan tanker gämileriň arasynda Q-max görnüşli gämi iň kuwwatlylaryň biri hasap edilýär. «Q» ― Katar döwletini, «max» ― iň ýokary ölçegli diýmegi aňladýar. Katardan suwuklandyrylan gazy daşamak üçin bu äpet tanker gämileriň köp sanlysy gurlandyr. Tebigy gazyň ýangyç we önümçilik çig maly hökmünde dünýä derejesinde ähmiýeti barha artýar. Şol sebäpli häzirki wagtda dünýä möçberinde suwuklandyrylan gazy daşaýjy gämileriň sany hem barha artýar. Diňe 2021-nji ýylyň başyna çenli dünýä ýüzünde suwuklandyrylan gazy daşaýan tanker gämileriň sany 600-e barypdyr.

Rahatgeldi AKMUHAMMEDOW
Türkmen döwlet binagärlik gurluşyk institutynyň talyby