Hormatly Prezidentimiz Derwezedäki gaz kraterini söndürmegi tabşyrdy

Hökümetiň 7-nji ýanwardaky mejlisinde Derweze sebitinde ýanyp duran tebigy gazy söndürmegiň çözgüdini tapmak bilen baglanyşykly anyk tabşyryklary berdi.

Mejlisiň dowamynda döwlet Baştutany wise-premýer Ş.Abdrahmanowa ýüzlenip, indi uzak ýyllardan bäri, Derweze sebitinde köp möçberde tebigy gazyň ýanyp durandygyny, bu ýagdaýyň ekologiýa, şeýle hem golaýynda ýaşaýan adamlaryň saglygyna ýaramaz täsir edýändigini aýtdy.

Galyberse-de, biz eksport edip, halkymyzyň eşretli durmuşda ýaşamagy üçin ep-esli möçberde girdeji aljak çig malymyzy ýitirýäris diýip, türkmen Lideri wise-premýere alymlary ýygnap, eger gerek bolsa, daşary ýurtly geňeşdarlary hem çekip, bu ýangyny söndürmegiň çözgüdini tapmagy tabşyrdy. Tebigy gazy peýdalanjak ýerimizi bolsa özümiz taparys diýip, döwlet Baştutany nygtady.